الاثنين، 21 يناير 2008

شياطين الانس يغلبون دائما شياطين الجن يا سلوى

الحلم ده بيتكرر كتير
أنا بحلم بالشيطان بس الأحلام تدرجت يعني الأول كنت بشعر إنه موجود ومختبئ في مكان ما وأظل أقول في الحلم
أنا أعلم بوجودك .. ومش خايفه منك وهحرقك وكده بكون قويه جدا أمامه ، المهم تكرر هذا الحلم بأشكال مختلفه
إلى أن ظهر لي مباشرة .. ولسه فاكرة شكله وجه أشبه بمثلث مائل للزرقه وأمسكت به وفضلت أقول أنا هحرقك وكده
وفضلت أقرأ قرآن وأذكار حتى احترق فعلا ولم يبقى منه سوى رأسه الهاويه واختفي الحلم لمده شهرين مثلا ثم بدأ يعود كما بدأ .. يعني الشيطان مختفي لكني أعلم بوجوده وأظل أهدده إن ظهر أني سأحرقه

سلوى


التفسيــــــــر
بصى يا ستى انا عايزا أكد على حاجة مهمة جدا ، مفيش حاجة اسمها جن بيلبس حد ، " وما خلقنا الانس والجن الا ليعبدون " يعنى هما ملهمش دعوة بينا خالص خالص ولا احنا لينا دعوة بيهم ، واى حد بيضحك على حد فى السكة دى بيتكشف بعد شوية ، يعنى اطمنى خالص انت مش ملبوسة باى حاجة من الحاجات دى ، لكن المشكلة الحقيقية انك ملبوسة بشيطان من نوع آخر ، انت مرعوبة من الموت ، خايفة أوى من بكرا ، مش عارفة ايه اللى ممكن يحصلك بعدين ولا مصدقة ان ربنا معاك اوى اوى اوى ، بأمارة انك لما بتهددى الشيطان دا انك هاتحرقيه انت بترتاحى وهو بيخاف ورمز الحرق هنا له علاقة بالايمان القوى والثقة الشديدة فى حب ربنا لك وانه هاينجيك من كل سوء وعلى فكرة برضه مهما كانت أخطأنا ربنا عمره ما يحاسبنا عليها بقسوة الاحساس اللى انت حاساه ، فيه حاجة مضايقاكى طول الوقت وفى الشهرين اللى اختفى فيهم الحلم دا ، كانت الحاجة دى مستقرة وهادية وبعد كدا ابتدت تانى تتوتر والحكاية دى لها علاقة كبيرة بأفعال انت مش بتحبى تقومى بيها ،سواء فى الشغل او البيت او مع الا صدقاء ودا بيخليكى طول الوقت عندك احساس بتأنيب الضمير ..لكن فى اخر الامر انت هاتقدرى على شيطان نفسك وتحرقيه فعلا ، بس انت دلوقتى لسه مصاحباه شوية ..
والله أعلم

الوحدة وقسوتها

أزيك يا سهى
يارب تكونى بخير
أنا ريم
www.barbyremo.blogspot.com
عندى حلم بيتكرر معايا كتير لدرجه انى بقيت عارفه إنى هحلم بيه لما بكون داخله أنام وبقى بيتكرر معايا حتى فى نومى وقت العصرفقلت ابعتلك أسألك جايز الاقى عندك تفسير ليه يساعدنى على انى اتخلص منه دايما بحلم بكل الناس اللى عرفتهم فى حياتى متجمعين فى مكان واحد مش بقدر احدد ملامح المكان ده ودايما بكون زى الغريبه وسطهم بتفرج على حوارهم وكلامهم مع بعض من غير ما اتدخل ولا حتى احاول اظهر نفسى بحاول استخبى منهم ، استغرب ازاى الناس دى اتجمعت مع بعضها وليه اخبي نفسى ودايما بينتهى التجمع ده بانى بكون لوحدى فى مكان مجهول برده بس ضلمه جدا مفيش فى نور غيرعلى حاجه وحده بس شئ كده مش بعرف احدد تفاصيله او انسان شكله غريب بيفضل يطاردنى وانا بجرى بكل قوتى وفى النهايه بيمسكنى وانا بفضل اقاوم فيه لغايه ما اصحى من نومى مفزوعه فى بعض الاحلام مش كلها بتظهر ماما فى حلمى (هى متوفيه من 4 سنين) بتكون موجوده وسط الناس وبتكون عينها فى عينى بتراقيبنى ولما بيبدأ الشئ ده فى مطاردتى بنده عليها بس هى بتفضل بصالى ومش بتتحرك ناحيتى وبرده بينتهى الحلم بان بقاوم الشئ ده أو الشخص ده لما يمسكنى وبقول مفزوعه من نومى
التفسيــــــــر
ازيك يا ريم يارب تكونى بخير اشكرك اولا على ثقتك فيا وبعدين الحلم بتاعك دا صعب اوى ، من الواضح منه انك طول الوقت مضايقة وتعبانة ومتوترة من الناس رغم انك وسطهم فعلا ورغم انك بتشتغلى فى حاجة او بتعملى حاجة ليها علاقة بوجود ناس كتير اوىوانت حاسة بوحدة مرعبة ودائما بتقعى فى ناس غلط ، يعنى خدى بالك من نفسك كويس ومفيش داعى تتسرعى فى الحكم على الناس او العشم بيهم ودى نصيحة كانت دائما تقولها لك والدتك رحمة الله عليها ، انت كنت متعلقة بيها اوى اوى ، وهى مش موجودة دلوقتى عشان تخرجك من مشاكلك ، انت لازم تحلها لوحدك وهى مكانها بتبص عليكى بتشوفك هاتعملى ايه لوحدك مع اللى بيجرى وراكى ، خدىبالك اوى من نفسك لانك مطمع كمان ،عندك اكتر من حاجة تخلى الناس تطمع فيك بوحشية مش حب ، ودا سبب احساسك بالخوف المستمر حتى فى الحياة ، وعلى فكرة أنت بتبانى قلبك جرىء ومستعفية ومحدش يقدر عليكى ، لكن الحقيقة انك بتخافى من الناس اوى ، عموما ربنا يوفقك يارب فى طريقك ويقوى قلبك على احتمال اللى جاى وعلى فكرة انشألله المصاعب خلاص هاتهون يا قمر تحياتى لك

الأحد، 13 يناير 2008

الفراق قدر العشاق

سهي
بعد التحية

لقد حلمت بان الشخص الذي كنت مرتبطة به متواجد في منزلنا و كان يرتدي قميصا و تحته ما يشبة التيشرت ولكنه قد كان ممزق بشكل بشع جدا و القميص رغم انه كان مغلق كان يكشف هذا القطع جدا وقد رايته واندهشت و تساءلت كيف اتي الينا بهذا الشكل وقد صعب علي شكله جدا ونويت ان اقوم بتخييط هذا القطع حتي لا يراه احد ولكني حزنت و خجلت عندما رأيت عين امي قد راته وشعرت بإحراج شديد ولكني اندهشت للقطع الذي كان في الجزء الشمال ناحية القلب تقريبا يصل من اعلي كتفه حتي قلبه ثم استيقظت واول الحلم كنا معا وتعجبت انه معي تفتكري دي تخاريف ولا ايه
تفسير الحلم
بالطبع هذا ليس تخريف ، هو رعب من الفقدان الحقيقى لحبيب لن تستطيعى نسيانه ابدا ، فشلت العلاقة بينك وبينه نظرا لضيق ذات اليد من ناحيته
ووالدتك كانت من اشد المتعاطفين معه والمعارضين له ايضا وقد ألمك فراقه جدا جدا وهو لا يزال يفكر فيك وجرحه كبيرا ، أعانه الله على تحمل ما هو فيه
انت حاولت الوقوف بجانبه ولكنك فشلت
انه قدر ، سيظل بجرحه وتظلين بمعاناة فقدك له
والله اعلم